నారాయణీయం దశక 11
క్రమేణ సర్గే పరివర్ధమానే
కదాపి దివ్యాః సనకాదయస్తే ।
భవద్విలోకాయ వికుంఠలోకం
ప్రపేదిరే మారుతమందిరేశ ॥1॥
మనోజ్ఞనైశ్రేయసకాననాద్యై-
రనేకవాపీమణిమందిరైశ్చ ।
అనోపమం తం భవతో నికేతం
మునీశ్వరాః ప్రాపురతీతకక్ష్యాః ॥2॥
భవద్దిద్దృక్షూన్భవనం వివిక్షూన్
ద్వాఃస్థౌ జయస్తాన్ విజయోఽప్యరుంధామ్ ।
తేషాం చ చిత్తే పదమాప కోపః
సర్వం భవత్ప్రేరణయైవ భూమన్ ॥3॥
వైకుంఠలోకానుచితప్రచేష్టౌ
కష్టౌ యువాం దైత్యగతిం భజేతమ్ ।
ఇతి ప్రశప్తౌ భవదాశ్రయౌ తౌ
హరిస్మృతిర్నోఽస్త్వితి నేమతుస్తాన్ ॥4॥
తదేతదాజ్ఞాయ భవానవాప్తః
సహైవ లక్ష్మ్యా బహిరంబుజాక్ష ।
ఖగేశ్వరాంసార్పితచారుబాహు-
రానందయంస్తానభిరామమూర్త్యా ॥5॥
ప్రసాద్య గీర్భిః స్తువతో మునీంద్రా-
ననన్యనాథావథ పార్షదౌ తౌ ।
సంరంభయోగేన భవైస్త్రిభిర్మా-
ముపేతమిత్యాత్తకృపం న్యగాదీః ॥6॥
త్వదీయభృత్యావథ కాశ్యపాత్తౌ
సురారివీరావుదితౌ దితౌ ద్వౌ ।
సంధ్యాసముత్పాదనకష్టచేష్టౌ
యమౌ చ లోకస్య యమావివాన్యౌ ॥7॥
హిరణ్యపూర్వః కశిపుః కిలైకః
పరో హిరణ్యాక్ష ఇతి ప్రతీతః ।
ఉభౌ భవన్నాథమశేషలోకం
రుషా న్యరుంధాం నిజవాసనాంధౌ ॥8॥
తయోర్హిరణ్యాక్షమహాసురేంద్రో
రణాయ ధావన్ననవాప్తవైరీ ।
భవత్ప్రియాం క్ష్మాం సలిలే నిమజ్య
చచార గర్వాద్వినదన్ గదావాన్ ॥9॥
తతో జలేశాత్ సదృశం భవంతం
నిశమ్య బభ్రామ గవేషయంస్త్వామ్ ।
భక్తైకదృశ్యః స కృపానిధే త్వం
నిరుంధి రోగాన్ మరుదాలయేశ ॥10।
నారాయణీయం దశక 12
స్వాయంభువో మనురథో జనసర్గశీలో
దృష్ట్వా మహీమసమయే సలిలే నిమగ్నామ్ ।
స్రష్టారమాప శరణం భవదంఘ్రిసేవా-
తుష్టాశయం మునిజనైః సహ సత్యలోకే ॥1॥
కష్టం ప్రజాః సృజతి మయ్యవనిర్నిమగ్నా
స్థానం సరోజభవ కల్పయ తత్ ప్రజానామ్ ।
ఇత్యేవమేష కథితో మనునా స్వయంభూః -
రంభోరుహాక్ష తవ పాదయుగం వ్యచింతీత్ ॥ 2 ॥
హా హా విభో జలమహం న్యపిబం పురస్తా-
దద్యాపి మజ్జతి మహీ కిమహం కరోమి ।
ఇత్థం త్వదంఘ్రియుగలం శరణం యతోఽస్య
నాసాపుటాత్ సమభవః శిశుకోలరూపీ ।3॥
అంగుష్ఠమాత్రవపురుత్పతితః పురస్తాత్
భోయోఽథ కుంభిసదృశః సమజృంభథాస్త్వమ్ ।
అభ్రే తథావిధముదీక్ష్య భవంతముచ్చై -
ర్విస్మేరతాం విధిరగాత్ సహ సూనుభిః స్వైః ॥4॥
కోఽసావచింత్యమహిమా కిటిరుత్థితో మే
నాసాపుటాత్ కిము భవేదజితస్య మాయా ।
ఇత్థం విచింతయతి ధాతరి శైలమాత్రః
సద్యో భవన్ కిల జగర్జిథ ఘోరఘోరమ్ ॥5॥
తం తే నినాదముపకర్ణ్య జనస్తపఃస్థాః
సత్యస్థితాశ్చ మునయో నునువుర్భవంతమ్ ।
తత్స్తోత్రహర్షులమనాః పరిణద్య భూయ-
స్తోయాశయం విపులమూర్తిరవాతరస్త్వమ్ ॥6॥
ఊర్ధ్వప్రసారిపరిధూమ్రవిధూతరోమా
ప్రోత్క్షిప్తవాలధిరవాఙ్ముఖఘోరఘోణః ।
తూర్ణప్రదీర్ణజలదః పరిఘూర్ణదక్ష్ణా
స్తోతృన్ మునీన్ శిశిరయన్నవతేరిథ త్వమ్ ॥7॥
అంతర్జలం తదనుసంకులనక్రచక్రం
భ్రామ్యత్తిమింగిలకులం కలుషోర్మిమాలమ్ ।
ఆవిశ్య భీషణరవేణ రసాతలస్థా -
నాకంపయన్ వసుమతీమగవేషయస్త్వమ్ ॥8॥
దృష్ట్వాఽథ దైత్యహతకేన రసాతలాంతే
సంవేశితాం ఝటితి కూటకిటిర్విభో త్వమ్ ।
ఆపాతుకానవిగణయ్య సురారిఖేటాన్
దంష్ట్రాంకురేణ వసుధామదధాః సలీలమ్ ॥9॥
అభ్యుద్ధరన్నథ ధరాం దశనాగ్రలగ్న
ముస్తాంకురాంకిత ఇవాధికపీవరాత్మా ।
ఉద్ధూతఘోరసలిలాజ్జలధేరుదంచన్
క్రీడావరాహవపురీశ్వర పాహి రోగాత్ ॥10॥
నారాయణీయం దశక 13
హిరణ్యాక్షం తావద్వరద భవదన్వేషణపరం
చరంతం సాంవర్తే పయసి నిజజంఘాపరిమితే ।
భవద్భక్తో గత్వా కపటపటుధీర్నారదమునిః
శనైరూచే నందన్ దనుజమపి నిందంస్తవ బలమ్ ॥1॥
స మాయావీ విష్ణుర్హరతి భవదీయాం వసుమతీం
ప్రభో కష్టం కష్టం కిమిదమితి తేనాభిగదితః ।
నదన్ క్వాసౌ క్వాసవితి స మునినా దర్శితపథో
భవంతం సంప్రాపద్ధరణిధరముద్యంతముదకాత్ ॥2॥
అహో ఆరణ్యోఽయం మృగ ఇతి హసంతం బహుతరై-
ర్దురుక్తైర్విధ్యంతం దితిసుతమవజ్ఞాయ భగవన్ ।
మహీం దృష్ట్వా దంష్ట్రాశిరసి చకితాం స్వేన మహసా
పయోధావాధాయ ప్రసభముదయుంక్థా మృధవిధౌ ॥3॥
గదాపాణౌ దైత్యే త్వమపి హి గృహీతోన్నతగదో
నియుద్ధేన క్రీడన్ ఘటఘటరవోద్ఘుష్టవియతా ।
రణాలోకౌత్సుక్యాన్మిలతి సురసంఘే ద్రుతమముం
నిరుంధ్యాః సంధ్యాతః ప్రథమమితి ధాత్రా జగదిషే ॥4॥
గదోన్మర్దే తస్మింస్తవ ఖలు గదాయాం దితిభువో
గదాఘాతాద్భూమౌ ఝటితి పతితాయామహహ! భోః ।
మృదుస్మేరాస్యస్త్వం దనుజకులనిర్మూలనచణం
మహాచక్రం స్మృత్వా కరభువి దధానో రురుచిషే ॥5॥
తతః శూలం కాలప్రతిమరుషి దైత్యే విసృజతి
త్వయి ఛిందత్యేనత్ కరకలితచక్రప్రహరణాత్ ।
సమారుష్టో ముష్ట్యా స ఖలు వితుదంస్త్వాం సమతనోత్
గలన్మాయే మాయాస్త్వయి కిల జగన్మోహనకరీః ॥6॥
భవచ్చక్రజ్యోతిష్కణలవనిపాతేన విధుతే
తతో మాయాచక్రే వితతఘనరోషాంధమనసమ్ ।
గరిష్ఠాభిర్ముష్టిప్రహృతిభిరభిఘ్నంతమసురం
స్వపాదాంగుష్ఠేన శ్రవణపదమూలే నిరవధీః ॥7॥
మహాకాయః సోఽయం తవ చరణపాతప్రమథితో
గలద్రక్తో వక్త్రాదపతదృషిభిః శ్లాఘితహతిః ।
తదా త్వాముద్దామప్రమదభరవిద్యోతిహృదయా
మునీంద్రాః సాంద్రాభిః స్తుతిభిరనువన్నధ్వరతనుమ్ ॥8॥
త్వచి ఛందో రోమస్వపి కుశగణశ్చక్షుషి ఘృతం
చతుర్హోతారోఽంఘ్రౌ స్రుగపి వదనే చోదర ఇడా ।
గ్రహా జిహ్వాయాం తే పరపురుష కర్ణే చ చమసా
విభో సోమో వీర్యం వరద గలదేశేఽప్యుపసదః ॥9॥
మునీంద్రైరిత్యాదిస్తవనముఖరైర్మోదితమనా
మహీయస్యా మూర్త్యా విమలతరకీర్త్యా చ విలసన్ ।
స్వధిష్ణ్యం సంప్రాప్తః సుఖరసవిహారీ మధురిపో
నిరుంధ్యా రోగం మే సకలమపి వాతాలయపతే ॥10॥
నారాయణీయం దశక 14
సమనుస్మృతతావకాంఘ్రియుగ్మః
స మనుః పంకజసంభవాంగజన్మా ।
నిజమంతరమంతరాయహీనం
చరితం తే కథయన్ సుఖం నినాయ ॥1॥
సమయే ఖలు తత్ర కర్దమాఖ్యో
ద్రుహిణచ్ఛాయభవస్తదీయవాచా ।
ధృతసర్గరసో నిసర్గరమ్యం
భగవంస్త్వామయుతం సమాః సిషేవే ॥2॥
గరుడోపరి కాలమేఘక్రమం
విలసత్కేలిసరోజపాణిపద్మమ్ ।
హసితోల్లసితాననం విభో త్వం
వపురావిష్కురుషే స్మ కర్దమాయ ॥3॥
స్తువతే పులకావృతాయ తస్మై
మనుపుత్రీం దయితాం నవాపి పుత్రీః ।
కపిలం చ సుతం స్వమేవ పశ్చాత్
స్వగతిం చాప్యనుగృహ్య నిర్గతోఽభూః ॥4॥
స మనుః శతరూపయా మహిష్యా
గుణవత్యా సుతయా చ దేవహూత్యా ।
భవదీరితనారదోపదిష్టః
సమగాత్ కర్దమమాగతిప్రతీక్షమ్ ॥5॥
మనునోపహృతాం చ దేవహూతిం
తరుణీరత్నమవాప్య కర్దమోఽసౌ ।
భవదర్చననివృతోఽపి తస్యాం
దృఢశుశ్రూషణయా దధౌ ప్రసాదమ్ ॥6॥
స పునస్త్వదుపాసనప్రభావా-
ద్దయితాకామకృతే కృతే విమానే ।
వనితాకులసంకులో నవాత్మా
వ్యహరద్దేవపథేషు దేవహూత్యా ॥7॥
శతవర్షమథ వ్యతీత్య సోఽయం
నవ కన్యాః సమవాప్య ధన్యరూపాః ।
వనయానసముద్యతోఽపి కాంతా-
హితకృత్త్వజ్జననోత్సుకో న్యవాత్సీత్ ॥8॥
నిజభర్తృగిరా భవన్నిషేవా-
నిరతాయామథ దేవ దేవహూత్యామ్ ।
కపిలస్త్వమజాయథా జనానాం
ప్రథయిష్యన్ పరమాత్మతత్త్వవిద్యామ్ ॥9॥
వనమేయుషి కర్దమే ప్రసన్నే
మతసర్వస్వముపాదిశన్ జనన్యై ।
కపిలాత్మక వాయుమందిరేశ
త్వరితం త్వం పరిపాహి మాం గదౌఘాత్ ॥10॥
నారాయణీయం దశక 15
మతిరిహ గుణసక్తా బంధకృత్తేష్వసక్తా
త్వమృతకృదుపరుంధే భక్తియోగస్తు సక్తిమ్ ।
మహదనుగమలభ్యా భక్తిరేవాత్ర సాధ్యా
కపిలతనురితి త్వం దేవహూత్యై న్యగాదీః ॥1॥
ప్రకృతిమహదహంకారాశ్చ మాత్రాశ్చ భూతా-
న్యపి హృదపి దశాక్షీ పూరుషః పంచవింశః ।
ఇతి విదితవిభాగో ముచ్యతేఽసౌ ప్రకృత్యా
కపిలతనురితి త్వం దేవహూత్యై న్యగాదీః ॥2॥
ప్రకృతిగతగుణౌఘైర్నాజ్యతే పూరుషోఽయం
యది తు సజతి తస్యాం తత్ గుణాస్తం భజేరన్ ।
మదనుభజనతత్త్వాలోచనైః సాఽప్యపేయాత్
కపిలతనురితి త్వం దేవహూత్యై న్యగాదీః ॥3॥
విమలమతిరుపాత్తైరాసనాద్యైర్మదంగం
గరుడసమధిరూఢం దివ్యభూషాయుధాంకమ్ ।
రుచితులితతమాలం శీలయేతానువేలం
కపిలతనురితి త్వం దేవహూత్యై న్యగాదీః ॥4॥
మమ గుణగణలీలాకర్ణనైః కీర్తనాద్యై-
ర్మయి సురసరిదోఘప్రఖ్యచిత్తానువృత్తిః ।
భవతి పరమభక్తిః సా హి మృత్యోర్విజేత్రీ
కపిలతనురితి త్వం దేవహూత్యై న్యగాదీః ॥5॥
అహహ బహులహింసాసంచితార్థైః కుటుంబం
ప్రతిదినమనుపుష్ణన్ స్త్రీజితో బాలలాలీ ।
విశతి హి గృహసక్తో యాతనాం మయ్యభక్తః
కపిలతనురితిత్వం దేవహూత్యై న్యగాదీః ॥6॥
యువతిజఠరఖిన్నో జాతబోధోఽప్యకాండే
ప్రసవగలితబోధః పీడయోల్లంఘ్య బాల్యమ్ ।
పునరపి బత ముహ్యత్యేవ తారుణ్యకాలే
కపిలతనురితి త్వం దేవహూత్యై న్యగాదీః ॥7॥
పితృసురగణయాజీ ధార్మికో యో గృహస్థః
స చ నిపతతి కాలే దక్షిణాధ్వోపగామీ ।
మయి నిహితమకామం కర్మ తూదక్పథార్థం
కపిల్తనురితి త్వం దేవహూత్యై న్యగాదీః ॥8॥
ఇతి సువిదితవేద్యాం దేవ హే దేవహూతిం
కృతనుతిమనుగృహ్య త్వం గతో యోగిసంఘైః ।
విమలమతిరథాఽసౌ భక్తియోగేన ముక్తా
త్వమపి జనహితార్థం వర్తసే ప్రాగుదీచ్యామ్ ॥9॥
పరమ కిము బహూక్త్యా త్వత్పదాంభోజభక్తిం
సకలభయవినేత్రీం సర్వకామోపనేత్రీమ్ ।
వదసి ఖలు దృఢం త్వం తద్విధూయామయాన్ మే
గురుపవనపురేశ త్వయ్యుపాధత్స్వ భక్తిమ్ ॥10॥
నారాయణీయం దశక 16
దక్షో విరించతనయోఽథ మనోస్తనూజాం
లబ్ధ్వా ప్రసూతిమిహ షోడశ చాప కన్యాః ।
ధర్మే త్రయోదశ దదౌ పితృషు స్వధాం చ
స్వాహాం హవిర్భుజి సతీం గిరిశే త్వదంశే ॥1॥
మూర్తిర్హి ధర్మగృహిణీ సుషువే భవంతం
నారాయణం నరసఖం మహితానుభావమ్ ।
యజ్జన్మని ప్రముదితాః కృతతూర్యఘోషాః
పుష్పోత్కరాన్ ప్రవవృషుర్నునువుః సురౌఘాః ॥2॥
దైత్యం సహస్రకవచం కవచైః పరీతం
సాహస్రవత్సరతపస్సమరాభిలవ్యైః ।
పర్యాయనిర్మితతపస్సమరౌ భవంతౌ
శిష్టైకకంకటమముం న్యహతాం సలీలమ్ ॥3॥
అన్వాచరన్నుపదిశన్నపి మోక్షధర్మం
త్వం భ్రాతృమాన్ బదరికాశ్రమమధ్యవాత్సీః ।
శక్రోఽథ తే శమతపోబలనిస్సహాత్మా
దివ్యాంగనాపరివృతం ప్రజిఘాయ మారమ్ ॥4॥
కామో వసంతమలయానిలబంధుశాలీ
కాంతాకటాక్షవిశిఖైర్వికసద్విలాసైః ।
విధ్యన్ముహుర్ముహురకంపముదీక్ష్య చ త్వాం
భీరుస్త్వయాఽథ జగదే మృదుహాసభాజా ॥5॥
భీత్యాఽలమంగజ వసంత సురాంగనా వో
మన్మానసం త్విహ జుషధ్వమితి బ్రువాణః ।
త్వం విస్మయేన పరితః స్తువతామథైషాం
ప్రాదర్శయః స్వపరిచారకకాతరాక్షీః ॥6॥
సమ్మోహనాయ మిలితా మదనాదయస్తే
త్వద్దాసికాపరిమలైః కిల మోహమాపుః ।
దత్తాం త్వయా చ జగృహుస్త్రపయైవ సర్వ-
స్వర్వాసిగర్వశమనీం పునరుర్వశీం తామ్ ॥7॥
దృష్ట్వోర్వశీం తవ కథాం చ నిశమ్య శక్రః
పర్యాకులోఽజని భవన్మహిమావమర్శాత్ ।
ఏవం ప్రశాంతరమణీయతరావతారా-
త్త్వత్తోఽధికో వరద కృష్ణతనుస్త్వమేవ ॥8॥
దక్షస్తు ధాతురతిలాలనయా రజోఽంధో
నాత్యాదృతస్త్వయి చ కష్టమశాంతిరాసీత్ ।
యేన వ్యరుంధ స భవత్తనుమేవ శర్వం
యజ్ఞే చ వైరపిశునే స్వసుతాం వ్యమానీత్ ॥9॥
క్రుద్ధేశమర్దితమఖః స తు కృత్తశీర్షో
దేవప్రసాదితహరాదథ లబ్ధజీవః ।
త్వత్పూరితక్రతువరః పునరాప శాంతిం
స త్వం ప్రశాంతికర పాహి మరుత్పురేశ ॥10॥
నారాయణీయం దశక 17
ఉత్తానపాదనృపతేర్మనునందనస్య
జాయా బభూవ సురుచిర్నితరామభీష్టా ।
అన్యా సునీతిరితి భర్తురనాదృతా సా
త్వామేవ నిత్యమగతిః శరణం గతాఽభూత్ ॥1॥
అంకే పితుః సురుచిపుత్రకముత్తమం తం
దృష్ట్వా ధ్రువః కిల సునీతిసుతోఽధిరోక్ష్యన్ ।
ఆచిక్షిపే కిల శిశుః సుతరాం సురుచ్యా
దుస్సంత్యజా ఖలు భవద్విముఖైరసూయా ॥2॥
త్వన్మోహితే పితరి పశ్యతి దారవశ్యే
దూరం దురుక్తినిహతః స గతో నిజాంబామ్ ।
సాఽపి స్వకర్మగతిసంతరణాయ పుంసాం
త్వత్పాదమేవ శరణం శిశవే శశంస ॥3॥
ఆకర్ణ్య సోఽపి భవదర్చననిశ్చితాత్మా
మానీ నిరేత్య నగరాత్ కిల పంచవర్షః ।
సందృష్టనారదనివేదితమంత్రమార్గ-
స్త్వామారరాధ తపసా మధుకాననాంతే ॥4॥
తాతే విషణ్ణహృదయే నగరీం గతేన
శ్రీనారదేన పరిసాంత్వితచిత్తవృత్తౌ ।
బాలస్త్వదర్పితమనాః క్రమవర్ధితేన
నిన్యే కఠోరతపసా కిల పంచమాసాన్ ॥5॥
తావత్తపోబలనిరుచ్ఛ్-వసితే దిగంతే
దేవార్థితస్త్వముదయత్కరుణార్ద్రచేతాః ।
త్వద్రూపచిద్రసనిలీనమతేః పురస్తా-
దావిర్బభూవిథ విభో గరుడాధిరూఢః ॥6॥
త్వద్దర్శనప్రమదభారతరంగితం తం
దృగ్భ్యాం నిమగ్నమివ రూపరసాయనే తే ।
తుష్టూషమాణమవగమ్య కపోలదేశే
సంస్పృష్టవానసి దరేణ తథాఽఽదరేణ ॥7॥
తావద్విబోధవిమలం ప్రణువంతమేన-
మాభాషథాస్త్వమవగమ్య తదీయభావమ్ ।
రాజ్యం చిరం సమనుభూయ భజస్వ భూయః
సర్వోత్తరం ధ్రువ పదం వినివృత్తిహీనమ్ ॥8॥
ఇత్యూచిషి త్వయి గతే నృపనందనోఽసా-
వానందితాఖిలజనో నగరీముపేతః ।
రేమే చిరం భవదనుగ్రహపూర్ణకామ-
స్తాతే గతే చ వనమాదృతరాజ్యభారః ॥9॥
యక్షేణ దేవ నిహతే పునరుత్తమేఽస్మిన్
యక్షైః స యుద్ధనిరతో విరతో మనూక్త్యా ।
శాంత్యా ప్రసన్నహృదయాద్ధనదాదుపేతా-
త్త్వద్భక్తిమేవ సుదృఢామవృణోన్మహాత్మా ॥10॥
అంతే భవత్పురుషనీతవిమానయాతో
మాత్రా సమం ధ్రువపదే ముదితోఽయమాస్తే ।
ఏవం స్వభృత్యజనపాలనలోలధీస్త్వం
వాతాలయాధిప నిరుంధి మమామయౌఘాన్ ॥11॥
నారాయణీయం దశక 18
జాతస్య ధ్రువకుల ఏవ తుంగకీర్తే-
రంగస్య వ్యజని సుతః స వేననామా ।
యద్దోషవ్యథితమతిః స రాజవర్య-
స్త్వత్పాదే నిహితమనా వనం గతోఽభూత్ ॥1॥
పాపోఽపి క్షితితలపాలనాయ వేనః
పౌరాద్యైరుపనిహితః కఠోరవీర్యః ।
సర్వేభ్యో నిజబలమేవ సంప్రశంసన్
భూచక్రే తవ యజనాన్యయం న్యరౌత్సీత్ ॥2॥
సంప్రాప్తే హితకథనాయ తాపసౌఘే
మత్తోఽన్యో భువనపతిర్న కశ్చనేతి ।
త్వన్నిందావచనపరో మునీశ్వరైస్తైః
శాపాగ్నౌ శలభదశామనాయి వేనః ॥3॥
తన్నాశాత్ ఖలజనభీరుకైర్మునీంద్రై-
స్తన్మాత్రా చిరపరిరక్షితే తదంగే ।
త్యక్తాఘే పరిమథితాదథోరుదండా-
ద్దోర్దండే పరిమథితే త్వమావిరాసీః ॥4॥
విఖ్యాతః పృథురితి తాపసోపదిష్టైః
సూతాద్యైః పరిణుతభావిభూరివీర్యః ।
వేనార్త్యా కబలితసంపదం ధరిత్రీ-
మాక్రాంతాం నిజధనుషా సమామకార్షీః ॥5॥
భూయస్తాం నిజకులముఖ్యవత్సయుక్త్యై-
ర్దేవాద్యైః సముచితచారుభాజనేషు ।
అన్నాదీన్యభిలషితాని యాని తాని
స్వచ్ఛందం సురభితనూమదూదుహస్త్వమ్ ॥6॥
ఆత్మానం యజతి మఖైస్త్వయి త్రిధామ-
న్నారబ్ధే శతతమవాజిమేధయాగే ।
స్పర్ధాలుః శతమఖ ఏత్య నీచవేషో
హృత్వాఽశ్వం తవ తనయాత్ పరాజితోఽభూత్ ॥7॥
దేవేంద్రం ముహురితి వాజినం హరంతం
వహ్నౌ తం మునివరమండలే జుహూషౌ ।
రుంధానే కమలభవే క్రతోః సమాప్తౌ
సాక్షాత్త్వం మధురిపుమైక్షథాః స్వయం స్వమ్ ॥8॥
తద్దత్తం వరముపలభ్య భక్తిమేకాం
గంగాంతే విహితపదః కదాపి దేవ ।
సత్రస్థం మునినివహం హితాని శంస-
న్నైక్షిష్ఠాః సనకముఖాన్ మునీన్ పురస్తాత్ ॥9॥
విజ్ఞానం సనకముఖోదితం దధానః
స్వాత్మానం స్వయమగమో వనాంతసేవీ ।
తత్తాదృక్పృథువపురీశ సత్వరం మే
రోగౌఘం ప్రశమయ వాతగేహవాసిన్ ॥10॥
నారాయణీయం దశక 19
పృథోస్తు నప్తా పృథుధర్మకర్మఠః
ప్రాచీనబర్హిర్యువతౌ శతద్రుతౌ ।
ప్రచేతసో నామ సుచేతసః సుతా-
నజీజనత్త్వత్కరుణాంకురానివ ॥1॥
పితుః సిసృక్షానిరతస్య శాసనాద్-
భవత్తపస్యాభిరతా దశాపి తే
పయోనిధిం పశ్చిమమేత్య తత్తటే
సరోవరం సందదృశుర్మనోహరమ్ ॥2॥
తదా భవత్తీర్థమిదం సమాగతో
భవో భవత్సేవకదర్శనాదృతః ।
ప్రకాశమాసాద్య పురః ప్రచేతసా-
ముపాదిశత్ భక్తతమస్తవ స్తవమ్ ॥3॥
స్తవం జపంతస్తమమీ జలాంతరే
భవంతమాసేవిషతాయుతం సమాః ।
భవత్సుఖాస్వాదరసాదమీష్వియాన్
బభూవ కాలో ధ్రువవన్న శీఘ్రతా ॥4॥
తపోభిరేషామతిమాత్రవర్ధిభిః
స యజ్ఞహింసానిరతోఽపి పావితః ।
పితాఽపి తేషాం గృహయాతనారద-
ప్రదర్శితాత్మా భవదాత్మతాం యయౌ ॥5॥
కృపాబలేనైవ పురః ప్రచేతసాం
ప్రకాశమాగాః పతగేంద్రవాహనః ।
విరాజి చక్రాదివరాయుధాంశుభి-
ర్భుజాభిరష్టాభిరుదంచితద్యుతిః ॥6॥
ప్రచేతసాం తావదయాచతామపి
త్వమేవ కారుణ్యభరాద్వరానదాః ।
భవద్విచింతాఽపి శివాయ దేహినాం
భవత్వసౌ రుద్రనుతిశ్చ కామదా ॥7॥
అవాప్య కాంతాం తనయాం మహీరుహాం
తయా రమధ్వం దశలక్షవత్సరీమ్ ।
సుతోఽస్తు దక్షో నను తత్క్షణాచ్చ మాం
ప్రయాస్యథేతి న్యగదో ముదైవ తాన్ ॥8॥
తతశ్చ తే భూతలరోధినస్తరూన్
క్రుధా దహంతో ద్రుహిణేన వారితాః ।
ద్రుమైశ్చ దత్తాం తనయామవాప్య తాం
త్వదుక్తకాలం సుఖినోఽభిరేమిరే ॥9॥
అవాప్య దక్షం చ సుతం కృతాధ్వరాః
ప్రచేతసో నారదలబ్ధయా ధియా ।
అవాపురానందపదం తథావిధ-
స్త్వమీశ వాతాలయనాథ పాహి మామ్ ॥10॥
నారాయణీయం దశక 20
ప్రియవ్రతస్య ప్రియపుత్రభూతా-
దాగ్నీధ్రరాజాదుదితో హి నాభిః ।
త్వాం దృష్టవానిష్టదమిష్టిమధ్యే
తవైవ తుష్ట్యై కృతయజ్ఞకర్మా ॥1॥
అభిష్టుతస్తత్ర మునీశ్వరైస్త్వం
రాజ్ఞః స్వతుల్యం సుతమర్థ్యమానః ।
స్వయం జనిష్యేఽహమితి బ్రువాణ-
స్తిరోదధా బర్హిషి విశ్వమూర్తే ॥2॥
నాభిప్రియాయామథ మేరుదేవ్యాం
త్వమంశతోఽభూః ౠషభాభిధానః ।
అలోకసామాన్యగుణప్రభావ-
ప్రభావితాశేషజనప్రమోదః ॥3॥
త్వయి త్రిలోకీభృతి రాజ్యభారం
నిధాయ నాభిః సహ మేరుదేవ్యా ।
తపోవనం ప్రాప్య భవన్నిషేవీ
గతః కిలానందపదం పదం తే ॥4॥
ఇంద్రస్త్వదుత్కర్షకృతాదమర్షా-
ద్వవర్ష నాస్మిన్నజనాభవర్షే ।
యదా తదా త్వం నిజయోగశక్త్యా
స్వవర్షమేనద్వ్యదధాః సువర్షమ్ ॥5॥
జితేంద్రదత్తాం కమనీం జయంతీ-
మథోద్వహన్నాత్మరతాశయోఽపి ।
అజీజనస్తత్ర శతం తనూజా-
నేషాం క్షితీశో భరతోఽగ్రజన్మా ॥6॥
నవాభవన్ యోగివరా నవాన్యే
త్వపాలయన్ భారతవర్షఖండాన్ ।
సైకా త్వశీతిస్తవ శేషపుత్ర-
స్తపోబలాత్ భూసురభూయమీయుః ॥7॥
ఉక్త్వా సుతేభ్యోఽథ మునీంద్రమధ్యే
విరక్తిభక్త్యన్వితముక్తిమార్గమ్ ।
స్వయం గతః పారమహంస్యవృత్తి-
మధా జడోన్మత్తపిశాచచర్యామ్ ॥8॥
పరాత్మభూతోఽపి పరోపదేశం
కుర్వన్ భవాన్ సర్వనిరస్యమానః ।
వికారహీనో విచచార కృత్స్నాం
మహీమహీనాత్మరసాభిలీనః ॥9॥
శయువ్రతం గోమృగకాకచర్యాం
చిరం చరన్నాప్య పరం స్వరూపమ్ ।
దవాహృతాంగః కుటకాచలే త్వం
తాపాన్ మమాపాకురు వాతనాథ ॥10॥
రెండవ భాగంలో 20 నుండి 30 వరకు ➡
This Document is Sponsored by: Srinivas Vadarevu - Principal Applied Scientist Lead, Microsoft Bing, Sunnyvale, CA - USA.
