శ్రావణ మాస విశేషములు - Śrāvaṇa māsa viśēṣamulu - Shravana Masa Visheslu

శ్రావణమాసం లక్ష్మీ ప్రదమైనమాసం. స్థితికారుడు అయిన శ్రీమహావిష్ణువుకు, ఆయన దేవేరి అయిన శ్రీమహాలక్ష్మికి అత్యంత ప్రీతికరమైనది ఈ శ్రావణమాసం. అనేక రకములైన వ్రతములు, నోములు పూజలు ఆచరించడం వలన విశేష ఫలితాలను, సకల సౌభాగ్యాలను ప్రసాదించే దివ్యమైన మాసమే “శ్రావణ మాసం“.

   ఈ మాసంలో ప్రతీ ఇల్లూ, ఆలయాన్ని తలపిస్తుంది. నెల రోజులపాటు ఉదయం, సాయంత్రం భగవన్నామస్మరణతో మారు మ్రోగుతాయి. శ్రావణంలో చేపట్టే ఎలాంటి కార్యానికైనా ఎంతో పవిత్రత ఉంటుంది.

చాంద్రమానం ప్రకారం తెలుగు సంవత్సరంలో చైత్రం లగాయతు చూస్తే, శ్రావణమాసం ఐదవ మాసం. ప్రస్తుతం వాడుకలో ఉన్న గ్రెగొర్రి క్యాలెండర్ ప్రకారం శ్రావణమాసం జూలై,ఆగష్టు నెలల్లో వచ్చును. వర్షఋతువు మూలంగా విరివిగా వర్షాలు పడతాయి.

శ్రావణమాసం వచ్చిందంటే, పిల్లల నుండి పెద్దల వరకూ... ఆనందించని వారుండరు. 

నూతన వధువులకు, గృహిణులకు, బ్రహ్మచారులకు, గృహస్థులకు, లౌకికానందాన్నే కాక... ఆధ్యాత్మికానందాన్ని కూర్చేది శ్రావణం. ఈ మాసంలో గృహాలన్నీ పసుపు కుంకుమలతో, పచ్చని మామిడాకు తోరణాలతో ఏర్పడిన లక్ష్మీశోభతో నిండి, ఉజ్జ్వలంగా ప్రకాశిస్తాయి.

ఆధ్యాత్మిక దృష్టితో చూసినప్పుడు వర్షఋతువు అనగా శ్రావణ, భాద్రపద మాసముల కాలం, ఈ సమయంలో వేదాధ్యయన కాలంగా చెప్పబడినది. అసలు 'శ్రావణ'మనే ఈ మాస నామమునందే వేదకాలము అనే అర్ధం ఉన్నది. శ్రవణమనగా "వినుట" అని అర్థం. వేదము గ్రంధమువలె పఠనం చేసేది కాదు. విని నేర్వదగినది. దీనిని వినిపించేవాడు గురువు. విని నేర్చుకొనే వారు శిష్యుడు. ఈ వేదమునకే 'స్వాధ్యాయ'మనేది మరో నామం.

ఈ విధంగా శ్రావణమాసం అందరికీ ఆనందాన్నిస్తుంది. శ్రీ మహావిష్ణువు జన్మ నక్షత్రం అయిన శ్రావణ నక్షత్రం పేరుతో ఏర్పడిన శ్రావణమాసంలో శ్రీమహావిష్ణువుకు చేసే పూజలు అనంత పుణ్యములను ఇస్తాయి.

శ్రావణమాసం మందు ఆచరించవలసిన వ్రతములలో మొదటిది ఈ #మంగళగౌరీ వ్రతం. ఈ నెలలో వచ్చే నాలుగు మంగళవారాలు మంగళగౌరీ ని పూజించాలి. పార్వతీదేవికి మరొకపేరు (గౌరీ) మంగళగౌరీ. సాధారణంగా కొత్తగా పెళ్ళయిన ముత్తైదువలు ఈ వ్రతాన్ని చేస్తారు. ఈ వ్రతాన్ని ఆచరించడంవల్ల మహిళలకు సౌభాగ్యకరమైన ఐదవతనం కలకాలం నిలుస్తుందని ప్రతీతి. ఈ వ్రతాన్ని గురించి స్వయంగా శ్రీకృష్ణుడు ద్రౌపదికి వివరించినట్లు పురాణాలు పేర్కొన్నాయి.

శ్రావణమాసం లో మహిళలకు అతి ముఖ్యమైన ప్రధానమైనవ్రతం #శ్రీవరలక్ష్మీ వ్రతం. దీనిని పూర్ణిమ ముందు వచ్చే శుక్రవారం ఆచరింపవలెను. ఈ రోజున వరలక్ష్మీ దేవతను పూజిస్తే అష్టలక్ష్మీ పూజలకు సమానం, అని కుటుంబసభ్యులు కూడా పాలుపంచుకుంటారు. ఈ దేవతను పూజిస్తే అష్టైశ్వర్యాలు అయిన సంపద, భూమి, శిక్షణ, ప్రేమ, కీర్తి, శాంతి, సంతోషం మరియు శక్తి వంటివి లభిస్తాయి.

దీపావళి తర్వాత జరుపుకొనే నాగులచవితి లాగ, మన రాష్ట్రంలోని కొన్ని ప్రాంతాలందు ఈరోజుని నాగులచవితి పండుగలా నాగుల పూజలను చేస్తారు. రోజంతా ఉపవాసం ఉండి, పుట్ట వద్దకు వెళ్ళి, పాలు పోసి, నాగదేవతను పూజిస్తారు. దుర్వాయుగ్మ వ్రతం చేయడానికి కూడా విశేషమైన రోజు ఈ శుక్ల చవితి.

శ్రావణశుద్ధ ఏకాదశిని పుత్రదా ఏకాదశి లేదా #లలిత_ఏకాదశి అంటారు. ఈ రోజున గొడుగు దానమిస్తే విశేష ఫలితాన్ని పొందవచ్చు. పుత్ర సంతానాన్ని కోరుకొనేవారు ఈనాడు ఏకాదశీ వ్రతాన్ని ఆచరించడం మంచిది.

అన్న-తమ్ముని శ్రేయస్సుని కోరుతూ అక్కాచెల్లెళ్ళు, సోదరుని చేతికి రాఖీ కట్టే పండుగే ఈ రాఖీ పూర్ణిమ. సోదరునికి రాఖీ కట్టి, నుదుట బొట్టుపెట్టి అనంతరం మిఠాయిలను తినిపిస్తారు. సోదరుడు, సోదరిని ఆశీర్వదించి కానుకలివ్వడం ఆనవాయితీ. 

ఈ రోజునే బ్రాహ్మణ, క్షత్రియ, వైశ్యులు తమ యజ్ఞోపవీతాన్ని ధరించి, పాత యజ్ఞోపవీతాన్ని విసర్జించడం ఆచారం. అందుచేత ఈ రోజుని #జంధ్యాలపూర్ణిమ అనికూడా అంటారు.

ఈరోజునే శ్రీమహావిష్ణువు వేదాలను రక్షించేందుకు హయగ్రీవ రూపం ధరించినట్లు పురాణాలు చెబుతున్నాయి. హయగ్రీవుడు జన్మించిన ఈ రోజుని హయగ్రీవ జయంతిగా జరుపుకొని, హయగ్రీవుడిని పూజించి శనగలు, ఉలవలతో గుగ్గిళ్ళు చేసి, నైవేద్యం సమర్పించడం సర్వ శ్రేష్టం.

మంత్రాలయంలో శ్రీ గురు రాఘవేంద్రస్వామి జయంతిని పురస్కరించుకొని విశేష పూజలను చేస్తారు. అంతే కాదు. క్రీ.శ.1671 వ సంవత్సరంలో విరోధికృత్ నామ సంవత్సర, శ్రావణ బహుళ విదియనాడు శ్రీ రాఘవేంద్రస్వామి వారు సజీవంగా సమాధిలో ప్రవేశించారని ప్రాచీన గ్రంధాలలో పేర్కొనబడినది.

శ్రీమహావిష్ణువు యొక్క ఎనిమిదో అవతారమే శ్రీకృష్ణ అవతారం. శ్రీకృష్ణ పరమాత్మ జన్మించిన శుదినమే ఈ శ్రీకృష్ణాష్టమి. దీనినే #జన్మాష్టమి అని కూడా పిలుస్తారు. ఈరోజు ఉదయం ఉపవాసం ఉండి, సాయంత్రం కృష్ణుడిని పూజించి, నైవేద్యంగా పాలు, పెరుగు, వెన్నలను సమర్పించడం, అనంతరం ఉట్టిని కొట్టడం, అనేది ఆచారంగా వస్తోంది.

ఇక బహుళ పక్షంలో వచ్చే ఏకాదశే #కామిక_ఏకాదశి. ఈరోజున నవనీతమును(వెన్న) దానం చెయ్యాలి. తద్వారా ఈతి బాధలు పోయి, కోరికలన్నీ నెరవేరుతాయని శాస్త్ర వచనం.

పోలాలఅమావాస్యను మహిళలు శ్రావణ మాసములో, కృష్ణపక్ష అమావాస్య రోజున జరుపుకుంటారు. సంతానాన్ని కోరుకునే ఇల్లాళ్లు, దీనిని చేసుకోవాలని పెద్దలు చెబుతుంటారు. కాలక్రమేణా పోలాల అమావాస్య అన్న పేరు కాస్తా, #పోలేరు అమావాస్యగా మారి,  పోలేరమ్మ అనే గ్రామ దేవతలను ఆరాధించే పర్వదినంగా మార్పు చెందింది. ఇది ఆచరించడం వల్ల, పిల్లలకు అకాల మృత్యుభయం తొలగిపోతుంది, అని శాస్త్రాలు చెబుతున్నాయి.ఓం శనైశ్చరాయనమః