స్వామి అయ్యప్ప చరితం | Swamy Ayyappa Charitam Part 14

స్వామి చిరునవ్వుతో ఆ పద్ధెనిమిది దేవతల మీదుగా ఎక్కి వెళ్లి జ్ఞానపీఠమీద ఆసీనుడైనాడు ! స్వామి పాదస్పర్శతో పవిత్రమైన ఆ మెట్లను అధిరోహించడం అందరికీ సాధ్యం కాదు ! మనం ఇటునుండి వెళ్దాం పద ! అంటూ ప్రక్క మరో మార్గాన పైన వున్న ఆలయానికి చేర్చాడు వపర రాజును ! ‘‘కాంతులు వెదజల్లుతున్న ఈ కాంతి గిరి (కాంతిమల) మీద వెలసిన స్వర్ణమందిరంలోకి అడుగుపెడుతున్నాం ! అటు చూడు రాజా !’’ అని వపర చూపిన దిశగా చూస్తూ అలాగే నిలబడిపోయాడు రాజు కళ్ళార్పడం మరచి ! 

  మణిఖచిత సింహాసనం మీద గంభీరంగా కూర్చుని వున్నాడు మణికంఠుడు దివ్య తేజంతో ప్రకాశిస్తూ ! దేవతలు , మునిముఖ్యులు ప్రక్కగా నిలబడి స్తోత్రాలు చదువుతున్నారు ! గంధర్వులు పుప్పువృష్టి కురిపిస్తూ సామగానం ఆలపిస్తున్నారు ! యక్ష , కిన్నేర , కింపురుషాది వూర్థ్వలోక వాసులందరూ తమ తమ రీతులలో స్వామిని సేవిస్తున్నారు ! స్వామి దివ్య మంగళ రూపాన్ని చూస్తూ భక్తి పారవశ్యంతో అంజలి ఘటించాడు రాజు ! దేవేంద్రుడు చేస్తున్న స్తోత్రం వింటూ అలౌకికానందంతో పులకించిపోయాడు !

ఓంకార మూర్తి మార్తిఘ్నం దేవం హరిహరాత్మజం |

జ్ఞానపీఠ నిలయం శాస్తారం ప్రణతోస్మ్యహం ||

నక్షత్ర నాథ వదనం నాథం త్రిభువనావనం |

అమితాశేష భువనం శాస్తారం నౌమి హవనం ||

మన్మథాయుత సౌందర్యం మహాభూత నిషేవితం |

మృగయారసికం శూరం శాస్తారం ప్రణతోస్మ్యహం ||

శివప్రదాయనం భక్తదైవతం పాండ్య బాలకం |

శార్దూల దుగ్థ హర్తారం శాస్తారం ప్రణతోస్మ్యహం ||

వారణేంద్ర సమారూఢం విశ్వత్రాణ పరాయణం |

వేదోద్బాసి కరాంభోజం శాస్తారం ప్రణతోస్మ్యహం ||

యక్షిణ్యాభిమతం పూర్ణ పుష్కళా పరిసేవితం |

క్షిప్ర ప్రసాదకం నిత్యం శాస్తారం ప్రణతోస్మ్యహం ||

  అంటూ స్తుతిస్తున్న దేవేంద్రుడి వైపు ప్రసన్నంగా చూస్తూ  ‘‘ఇంద్రా ! మీ అందరి భక్తిశ్రద్ధలకు ప్రసన్నుడినైనాను ! మీ ఆరాధన నాకు ఆనందాన్ని ప్రసాదించింది ! ఇక నేను తిరిగి పంబళ రాజ్యానికి వెళ్లి వారికందరికి జ్ఞానబోధ కావించవలసి వుంది ! మీరందరూ పులులుగా మారి నా వెంట రావలసి వుంటుంది ! అని చెప్పడం కూడా రాజు కర్ణపుటాలలో నినదించింది ! ‘‘సాక్షాత్తూ పరబ్రహ్మ స్వయంగా వచ్చి తన అవతార లక్ష్యం వివరించినా తానే పుత్ర వాత్సల్యంతో సరిగా అర్థం చేసుకోలేకపోయాడు ! అందుకు ఆ స్వామి తనను క్షమిస్తాడా ?’’ పశ్చాత్తాపం నిండిన హృదయంతో దీనంగా స్వామివైపే చూస్తూ అనుకున్నాడు రాజు ! ఆయన అంతరంగం అవగతమైనట్లు ప్రసన్నంగా చూసాడు మణికంఠుడు రాజువైపు !

  ‘‘రాజా ! నా సగుణ రూపాన్ని చూసి తృప్తి చెందావు గదా ! నిజానికి ప్రతి ప్రాణి శరీరం ఆలయమైతే ఈ ఆలయం హృదయ స్థానంలో నా పీఠం వెలసి వుంటుంది ! దానిమీద జ్యోతిరూపంలో వెలుగుతుండేది నేనే ! ఈ విషయాన్ని ఎన్నడూ మరవకు సుమా ! ఇక్కడ దేవతలచేత నిర్మింపబిన ఈ స్వర్ణదేవాలయం , నా సగుణ రూపం మానవుల సామాన్య దృష్టికి గోచరంకావు ! అందుకే భూలోకవాసులకోసం ఈ ప్రాంతం శబరిగిరి క్షేత్రంగా విలసిల్లాలని , ఇక్కడ నీవు నిర్మించే ఆలయం ఈ ఆలయాన్ని పోలి వుండాలని సంకల్పించాను ! అందుకే నిన్ను రప్పించి ఈ ఆలయాన్ని చూసే అవకాశం కల్పించాను ! అంతేకాదు ఆ ఆలయంలో నా విగ్రహ రూపం ఎలా వుంటుందో కూడా నీకు దర్శింపజేస్తున్నాను ! ఇలా చూడు’’ అన్నాడు మృదుమధుర గంభీర స్వరంతో ! రాజుకు స్వామి విగ్రహం బాలుని రూపంలో కుడి హస్తం ‘చిన్ముద్ర’ ను , ఎడమ హస్తం ‘అభయముద్ర’* ను ప్రదర్శిస్తూ వుండగా , కాళ్లు పట్టబంధంతో కట్టబడి ఎంతో విశిష్టంగా , ప్రత్యేకతతో దర్శనమిచ్చింది ! ఆ విగ్రహానికి రెండు చేతులు జోడించి భక్తిపూర్వకంగా నమస్కరించాడు !

  ‘‘స్వామి ! ఎంతో విశిష్టంగా ఉంది మీ విగ్రహరూపం ! మహిమాన్వితమైన ఈ రూపాన్ని ఎవరు ఇదేవిధంగా తయారుచేయగలుగుతారా ? అంతటి సమర్థులు ఈ సృష్టిలో వున్నారా ?’’ అడిగాడు రాజు సందేహంగా ! ‘‘నీకు ఆ సందేహం అవసరం లేదు ! అందుకు సమర్థుడిని నేను పంపుతాను ! విగ్రహ ప్రతిష్ట ఎవరుచేయాలో కూడా నేనే నిర్ణయించుతాను ! ఇక నీవు నిశ్చింతంగా తిరిగి వెళ్లు !’’ అని స్వామి చెప్పడంతో ఆందోళన దూరమై నిశ్చింతగా ఆనందభరితమైన హృదయంతో వపర వెంట శిబిరానికి తిరిగి వచ్చాడు రాజు. ‘‘రాజా ! ఇక నేను సెలవు తీసుకుంటాను !’’ అని అదృశ్యుడైనాడు వపర !

  ‘‘మహారాజా ! సూర్యోదయమైంది ! తమరు లేచి నిత్యకృత్యాలు ఆచరించి , పంబానదిలో స్నానం చేసివస్తే కొండపైకి వెళ్లి బాణం ఎక్కడ పడిందో కనుక్కోవచ్చు !’’ అంటూ మంత్రి సేనాధిపతులు వచ్చి లేపడంతో మెలకువ వచ్చింది రాజుకు కళ్లు విప్పి చూసిన రాజు మొదట అయోమయావస్థలో వుండిపోయాడు కొద్ది క్షణాలుపాటు ! తాను కొండమీద తారకబ్రహ్మ మణికంఠస్వామి దివ్య మంగళ విగ్రహాన్ని దర్శించడం , స్వర్ణ ఆలయం , రత్నఖచిత సింహాసనం వంటి జ్ఞానపీఠం , దానికి అమరివున్న మహిమాన్వితమైన మెట్లు , స్వామి ఉపదేశం తలచుకుంటూ వున్నరాజు ఆనందానుభూతిలోనుండి ఎట్లాగో వాస్తవంలోకి వచ్చి తాను స్వప్నంలో అవన్నీచూసినట్లు గ్రహించాడు !

  ఎంతటి దివ్యానుభూతిని అనుగ్రహించాడు స్వామి ! ఇక వెంటనే బయలుదేరి వెళ్లి బాణం పడిన తావును గుర్తిస్తాను ! అనుకుంటూ లేచి  పంబా నదిలో స్నానం ఆచరించి పరివారం వెంట కొండమీదకు చేరుకున్నాడు !  బాణం పడిన తావును త్వరగానే గుర్తించాడు కొండమీద ఒక సమతల ప్రదేశంలో ! ‘‘ఇక్కడే ఆలయ నిర్మాణం ప్రారంభించాలి’’ అంటూ ఎవరికోసమో చూస్తున్నట్లుగా చూస్తున్న రాజుతో  ‘‘మేము పని ప్రారంభిస్తాము మహారాజా ! మీరు అనుమతినివ్వండి’’ అంటూ ముందుకు వచ్చారు వెంట వచ్చినవారిలో నుండి కొందరు శిల్పులు ముందుకు వచ్చి ! ‘‘ఆగండి ! ఈ ఆలయం సామాన్యమైనది కాదు ! ఈ ఆలయాన్ని  నిర్మించడానికి మన స్వామే కొందరు నిపుణులను పంపుతాడు !’’ అన్నాడు రాజు ! సరిగ్గా అప్పుడే విశ్వకర్మ , అగస్త్య మహర్షి అక్కడకు వచ్చారు ! ‘‘మహాత్ములారా ! ప్రణామాలు ! మీకోసమే ఎదురుచూస్తున్నాను ! దయచేయండి !’’ గబగబా ఎదురువెళ్లి నమస్కరిస్తూ అన్నాడు రాజు ! ఆయనవైపు ప్రసన్నంగా చూశారు విశ్వకర్మ , అగస్త్య మహర్షి ! ‘‘ఇక మేము ఆలయ నిర్మాణం ప్రారంభిస్తాము ! మీరందరూ వెళ్లవచ్చును !’’ అని చెప్పడంతో రాజు , పరివారంతో కొండ కిందికి దిగి వచ్చి శిబిరంలో కూర్చుని ఎదురుచూడసాగాడు ! ‘‘ఇంకా ఎప్పుడు స్వామి ఆలయాన్ని , విగ్రహాన్ని కళ్లనింగా చూసే సమయం వస్తుందో గదా’’ అనుకుంటూ ఆత్రుతతో ఎదురుచూస్తున్న ఆయన నిరీక్షణ ఫలించింది , కొండ దిగి వస్తున్న వాళ్లను చూస్తూనే ! ఆ ఇద్దరి వెంట పరశువును భుజంమీద పెట్టుకుని గంభీరంగా నడిచి వస్తున్న మునిశ్రేష్ఠుడివైపు సంభ్రమంగా చూస్తూ గబగబా వాళ్ళను సమీపించి నమస్కరించాడు. ‘‘రాజా ! పరశురాములవారు స్వామి విగ్రహ ప్రతిష్ఠ కావించడానికి స్వయంగా రావడం నీ భాగ్య విశేషం ! పదండి ! దేవాలయాన్ని చూసి , స్వామి విగ్రహ ప్రతిష్ఠాపన కన్నులారా చూద్దురుగాని !’’ అని అగస్త్య ముని చెప్పడంతో అందరూ ఆనందోత్సాహాలతో వారి వెంట బయలుదేరారు.

అగస్త్య మహర్షి , పరశురాముడు , విశ్వకర్మ గురువులుగా ముందు నడస్తుంటే రాజు తన పరివారంతో వెనక అనుసరిస్తూ ఒక కొండ శిఖరాన్ని చేరుకున్నారు ! అక్కడ కనిపించిన ఆలయం సరిగ్గా తాను స్వప్నంలో చూసిన స్వర్ణదేవాలయాన్ని పోలి వుండటం చూసి ఆశ్చర్య చకితుడైనాడు రాజు, అగస్త్య మహర్షికి భక్తిపూర్వకంగా నమస్కరించి ‘‘నాకు కర్తవ్యోపదేశం కావించిన గురుదేవులు మీరు !మీ కృపా విశేషంవల్లనే తారకబ్రహ్మను స్వప్నంలో ఇటువంటిదే అయిన ఆలయంలో కొలువుతీరి వుండగా దర్శించే భాగ్యం లభించింది! గురుదేవా ! ఈ గిరి పేరేమిటి ? ఈ అరణ్యంలో ఈ ప్రాంతాన్ని ఏ విధంగా గుర్తించగలం ?’’ అని ప్రశ్నించాడు కుతూహలంగా చూస్తూ ! ‘‘రాజా ! ఇది శబరిగిరి ! ధర్మశాస్తా తన భక్తురాలైన శబరి నివసించిన ఈ గిరి శిఖరాన వెలిసి , ఈ ప్రాంతాన్ని మహిమాన్వితమైన పుణ్యక్షేత్రంగా చేయాలని సంకల్పించారు! అందుకే ఈ గిరి శబరిగిరిగానూ , దానిపై వెలిసే తను శబరీశునిగానూ ప్రసిద్ధి చెందుతారని ఆమెకు వరం ప్రసాదించారు ! మాతో వచ్చిన మీకు మార్గాయాసం తెలియలేదు గానీ నిజానికి ఈ ప్రాంతమంతా ఘోరారణ్యాలతో , క్రూర మృగాలతో నిండిన ఎత్తయిన కొండలమధ్యగా వుంది! ఈ శబరిగిరిని చేరడానికి కొండలు , లోయలు దాటుతూ , ముళ్లదారులలో నుండి జాగ్రత్తగా నడుస్తూ ఎంతో దూరం ప్రయాణిస్తేగాని ఇక్కడికి చేరుకోలేరు మానవులు! కానీ తన దర్శనం కోసం అకుంఠిత దీక్షతో , నియమనిష్టలు పాటిస్తూ వచ్చే తన భక్తులను అయ్యప్పస్వామిగా వెలసిన మణికంఠుడు గురువుగా మార్గోపదేశం చేస్తూ , కష్టాలు దాటి తన సన్నిధానికి చేరుకునేలా చేస్తాడు !’’ అంటూ వివరించి చెప్పారు అగస్త్య మహర్షి! ‘‘అలాగా ! మరి ఆ నియమ నిష్ఠలేమిటో..?’’ అని అడగబోతున్న రాజును వారిస్తూ ‘‘ఆ విషయం తర్వాత ! ముందు విగ్రహ ప్రతిష్ఠాపన కార్యక్రమాన్ని చూడండి ! పరశురాములవారు నిర్ణయించిన ముహూర్తం దగ్గరపడింది’’* అని ఆ వైపునకు వెళ్లారు అగస్త్య మహర్షి  !

  ‘‘భక్తులారా మీకోసమే ఈ విలక్షణమైన రూపంలో ఆవిర్భవించాడు అయ్యప్పస్వామి ! జాగ్రత్తగా చూడండి , బాలుని రూపంలో స్వామి కూర్చున్న భంగిమను ! స్వామి కుడి చేయి ‘చిన్ముద్ర’ ను చూపుతున్నది ! గురుమూర్తిగా జ్ఞాన బోధ చేస్తూ చూపే ఆ ముద్రే చిన్ముద్ర ! అందులోని ఐదు వ్రేళ్ళు ఏమి బోధిస్తున్నాయో చెబుతాను ! బొటనవ్రేలు పరమాత్మకు చిహ్నము ! చూపుడు వ్రేలు జీవాత్మకు ప్రతీక ! మధ్యవ్రేలు తమోగుణానికి , ఉంగరపు వ్రేలు రజోగుణానికి , చిటికినవ్రేలు సత్వగుణానికి ప్రతీకలు ! ఆ మూడు వ్రేళ్ళను విడిచి (మూడు గుణాలను విడిచి) జీవాత్మ అయిన చూపుడువ్రేలు , పరమాత్మ అయిన బొటనవ్రేలు వైపు వంగితే జీవాత్మ పరమాత్మలో లీనం కావడానికి సాధ్యవౌతుంది అని చెప్పడమే చిన్ముద్రలోని అంతరార్థం ! స్వామి ఎడమ చేయి పాదాలను చూపుతున్నట్లుగా వున్నది ! అది పరమాత్మలో జీవాత్మ లీనం కావాలంటే ముందుగా స్వామి పాదాలను శరణు కోరాలని సూచిస్తున్నది ! అంటే స్వామినే త్రికరణశుద్ధిగా నమ్మి పాదాలవద్ద శరణాగతి చేయడంవల్ల జీవాత్మకు పరమాత్మను చేరే సమర్థత కలుగుతుంది ! ‘పట్టబంధము’ అనే సూత్రము స్వామి మోకాళ్ల క్రింది నుండి వాటిని కలుపుతూ కట్టబడి వుండటం గమనించండి. నిశ్చలంగా ఆ భంగిమలో కూర్చుని తనను నమ్మి వచ్చే భక్తుల కోర్కెలు తీర్చివారిలో ఆధ్యాత్మిక చింతన పెంపొందేలా చేస్తానంటూ ప్రసన్నమైన ముఖంతో అభయం ప్రసాదిస్తున్నాడు అయ్యప్పస్వామి ! పట్టబంధము హరిహరుల అభిన్నత్వాన్ని సూచిస్తుంది ! ఇప్పుడు స్వామి దాల్చిన విలక్షణమైన రూపానికి అర్థం తెలుసుకున్నారు గదా ! ఇక మనసా, వాచా, కర్మణా (త్రికరణములు) ఆ స్వామినే శరణుకోరుతూ ప్రార్థించుదాం !’’