స్వామి అయ్యప్ప చరితం | Swamy Ayyappa Charitam Part 8

ఇలా జరగబోయేదంతా ముందేఅనుకునే సరికి మంత్రికి చాలా బాధవేసింది. సరే నేను ఏమి చేసేది తరువాత ఆలోచిస్తాను. ముందు ఏమి జరుగుతుందో చూస్తాను. అనుకొని అటు వైపు చూచేసరికి ..ఆ రోజు ‘‘మహారాణి ! నీవు నారాయణుడిని , నేను పరమేశ్వరుని సంతానం కోసం ఎంతకాలంగా ప్రార్థిస్తూనే ఉన్నాము ! అయినా వారికింతవరకు మనమీద కరుణ కలగలేదు ! స్థితి , లయకారకులైన వారిద్దరు కొన్ని సందర్భాలలో పరస్పరం విరుద్ధమైన కార్యాలు చేస్తుంటారని మన గురుదేవులు చెప్పనే చెప్పారు గదా ! ఆ సంగతి నీకు గుర్తుంది కదూ ?

   ‘మహావిష్ణువు వృషభ రూపంలో వచ్చిన రాక్షసుడిని వధించాడు ! పరమేశ్వరుడు వృషభాన్ని (నందిని) తన వాహనంగా చేసుకొని ఆప్యాయంతో పెంచుకున్నాడు. ఏనుగును (గజేంద్రుని) విష్ణువు కాపాడితే , పరమేశ్వరుడు రాక్షసుడైన గజాసురుని వధించాడు ! తనవారిని రక్షించడానికి విష్ణువు కృష్ణుడై గోవర్థనగిరి నెత్తుతే పరమేశ్వరుడు వింధ్య పర్వతాన్ని లోకహితం కోరి క్రిందకు వంగేలా చేశాడు. విష్ణువు కృష్ణుడిగా కాళీయుడనే విషసర్పం పడగలమీద కాళ్ళతో తొక్కుతూ నాట్యం చేస్తే పరమేశ్వరుడు విషసర్పమై వాసుకిని మెడకు హారంగా చుట్టుకున్నాడు.  ఈ విధంగా లోకరక్షణార్థం వారిద్దరూ కావించిన లీలలను ప్రస్తుతిస్తుంటారు మునిగణాలు వెండికొండమీద దర్శనమిచ్చే ఆ హరిహరులను ! అని ఈ విధంగా పరస్పర విరుద్ధమైన కార్యాలు ఆచరించే ఆ శివకేశవులను ప్రసన్నం చేసుకోవటానికి మనం తపస్సు చేయడానికి వెళితే మంచిదే కానీ రాజ్యభారాన్ని ప్రజా సంక్షేమాన్ని చూడవలసిన బాధ్యత ఎవరికి అప్పచెప్పాలా అని ఆలోచిస్తున్నాను!’’ అంటూ చెప్పాడు రాజశేఖరుడు పత్ని రాణీదేవితో , తన ఆలోచన గూర్చి !  ఆమె జవాబు చెప్పేలోపల ‘‘నారాయణ ! నారాయణ ! ఏమిటి రాజ దంపతులు ఏదో గంభీరమైన విషయం గూర్చి చర్చిస్తున్నట్లున్నారు?’’* అంటూ ప్రత్యక్షమైనాడు దేవర్షి నారదుడు! ‘‘దయచేయండి మునీంద్రా ! మీ రాకతో మా గృహం పావనమైంది ! ఆసీనులుకండి !’’* సంభ్రమంగా లేచి ఆయనకు భక్తి ప్రపత్తులతో పాద పూజ చేసి ఆ తీర్థాన్ని తలలమీద జల్లుకుని అతిథి మర్యాదలు జరిపారు రాజశేఖరుడు , ఆయన పత్ని ! 

‘‘త్రిలోక సంచారులైన మీకు మా గురించి తెలియకుండా వుంటుందా దేవర్షి ! సంతాన భాగ్యం కోసం ఇద్దరం మా ఇష్టదైవాలను ఎంతగానో ప్రార్థిస్తున్నాము ! వారి కరుణావృష్టి మా మీద ఎప్పుడూ ప్రసరింపజేస్తారా అని ఆశతో ఎదురుచూస్తున్నాము. మా నిరీక్షణ ఫలిస్తుందా మహర్షి?’’* అంటూ అడిగిన వాళ్లవైపు ప్రసన్నంగా చూసాడు నారదుడు ! ‘‘అతి త్వరలోనే ఫలిస్తుంది ! మీరెంతో అదృష్టవంతులు ! శివకేశవుల అనుగ్రహంతో మీరు మహిమాన్వితుడైన బాలుడికి తల్లిదండ్రులు కాగలరు ! ఆ శుభ సమయం కోసం వేచి వుండండి!’’ అంటూ వాళ్లను ఆనందభరితులను కావించాడు నారద మహర్షి ! ‘‘ధన్యులం మహర్షి ! ధన్యులం ! ఇక ఎంతకాలమైనా ఫరవాలేదు , ఆ శుభ సమయం కోసం వేచి వుంటాము ! మా హృదయభారం తీరిపోయింది మీ పలుకులతో !  మీకు మా కృతజ్ఞతలు!’’* అంటూ నమస్కరించారు రాజదంపతులు!

‘‘మహారాజా ! మన రాజ్యం సరిహద్దు ప్రాంతంలో అరణ్యాలలో క్రూర మృగాల బాధ ఎక్కువై ఆ ప్రాంత ప్రజలు ప్రాణాలు కోల్పోతున్నారు ! ఈ విషయం మీకు విన్నవించి తమను కాపాడమని కోరడానికి అక్కడ నివసించే ఆటవికులు వచ్చి మీ దర్శనం కోరుతున్నారు!’’  అంటూ విన్నవించాడు మహామంత్రి !  నారద మహర్షి వెళ్లిన తర్వాత తేలికపడిన మనస్సుతో సభా భవనానికి వచ్చిన రాజశేఖరుడికి మంత్రి చెప్పిన వార్త ఆందోళన కలిగించింది ! ‘‘నా పాలనలో ప్రజలు ఆపదల పాలవటం నేను సహించలేను ! వెంటనే వేటకు సన్నాహాలు కావించండి ! నేను స్వయంగా బయలుదేరి వెళ్లి ఆ క్రూరమృగాలను సంహరిస్తాను’’ అంటూ ఆదేశించాడు. వేటకు వెళ్లడానికి అన్నీ సిద్ధమైనాయి ! కొంతమంది సైనికులు వెంటరాగా వడిగల గుర్రాలు పూన్చిన రథంమీద అరణ్యభూములలోకి దూసుకుపోయాడు రాజశేఖరుడు !  క్రూర మృగాలను గురి చూసి నిశితమైన బాణాలతో కూల్చుతూ ముందుకు సాగుతున్నాడు.

  అది పవిత్రమైన పంబా నదీ తీరం !  పందల రాజ్యం సమీపంలోని దట్టమైన అరణ్యాల మధ్యగా ప్రవహిస్తుండే పంబా నదీ జలాలు ఆ ప్రాంత వాసులకు జీవనాధారాలు !  ఒడ్డున పచ్చని పచ్చిక ఆకులు పచ్చని తివాచీ పరిచినట్లు ఎవరి రాకకోసమో ఎదురుచూస్తున్నట్లున్నది. చల్లటిగాలి , గలగలమని పారుతున్న నదీ జలాలు , పూవులు జలజలమని రాలుస్తున్న వృక్షాలు - ప్రకృతి శోభాయమానంగా ముస్తాబై ఎవరికో స్వాగతం చెప్పడానికి ఆత్రుత పడుతున్నట్లుగా వున్నది.  ఆ నిరీక్షణ ఫలించినట్లు ఆకాశం నుండి జ్వాజ్వలమానంగా వెలుగుతున్న జ్యోతి పుంజం సాక్షాత్కరించింది నదీ తీరాన ! అందులోనుండి హరిహరులు వారి మధ్యగా భూతనాథుడు ప్రకటితమైనారు !

హరిహరులు భూతనాథునివైపు ప్రసన్నంగా చూస్తూ ‘‘కుమారా ! నీవు మానవ రూపంతో భూమిమీద కావించవలసిన దుష్టశిక్షణకు నాంది పలకవలసిన శుభ సమయం ఆసన్నమైంది. ఇక్కడికి మరికొద్దిసేపట్లో మా భక్తుడైన పందల రాజు రాగలడు ! నీవాయనకు పుత్రుడివై ఆయన చిరకాల వాంఛితాన్ని నెరవేర్చు!’’ అన్నారు. 

  ‘‘మీ ఆజ్ఞను శిరసావహిస్తున్నాను!’’ అంటూ కళ్లు మూసుకుని ధ్యానించాడు భూతనాథుడు. మరుక్షణమే పొత్తిళ్లలో పాపడుగా మారి పచ్చికమీద సాక్షాత్కరించి కెవ్వుమన్నాడు ! హరిహరులు శిశువు తలమీద నిమిరి దీవించారు ! మహావిష్ణువు మెడలో మణిహారంతో ప్రకాశిస్తున్న శిశువువైపు ఆప్యాయంగా చూస్తూ ‘‘ఇకపై మణికంఠుడనే పేరుతో ప్రవర్థమానుడై ఈ ప్రాంత వాసులను తన లీలలతో ధన్యులను కావిస్తాడు భూతనాథుడు’’ అన్నాడు. ‘‘అవును !  మహిషిని సంహరించి ధర్మ సంస్థాపన కావిస్తాడు ధర్మశాస్తా !’’* పరమేశ్వరుడు ప్రసన్నంగా చూస్తూ అన్నాడు. దూరం నుండి కలకలం వినరావడంతో అంతర్థానం చెందారిద్దరూ!

‘‘సారథి ! ఆగు !’’ రథాన్ని ఆపించి దిగి చుట్టూ చూసాడు రాజశేఖరుడు ! చెవి వొగ్గి జాగ్రత్తగా విని ‘‘ఎవరో పసిపాపడి ఏడుపు వినిపిస్తున్నది ఆ ప్రక్కనుండి ! అటువైపు పోనివ్వు!’’* అంటూ ఎక్కి కూర్చున్నాడు. రథం పంబానది ఒడ్డుకు చేరింది ! దిగి చుట్టూ చూసిన రాజుకు పచ్చికమీద పొత్తిళ్లలో పడుకుని కెవ్వుమని ఏడుస్తున్న పసిపాపడు కనిపించడంతో గబగబా అటువైపు వెళ్లాడు !

అంతవరకు పడగ ఎత్తి పట్టి బాలుడి మీద ఎండ పడకుండా చూస్తున్న పాము రాజు వస్తుండటం చూసి చర్రున ప్రక్కకి జారిపోయింది.

  ‘‘ఆహా ! ఎంత దేదీప్యమానంగా వెలిగిపోతున్నాడు ! మెడలో ఆ మణిహారం చూస్తుంటే ఆశ్చర్యం కలుగుతున్నది ! ఎవరీ బాలుడు ? ఎవరీ విధంగా విడిచి వెళ్లుంటారు ! పాము పడగ ఎత్తి పట్టి కాపాడుతూ వుండిందంటే ఈ బాలుడెవరో మహత్తర జాతకుడై వుంటాడు ! ఈ చుట్టుప్రక్కల మనుష్య సంచారం లేదు ! ఆ పరమేశ్వరుడు తన కోసమే ఈ శిశువునిక్కడ వుంచి వుంటాడా ? సందేహం లేదు ! నారద మహర్షి చెప్పినట్లు తన కోసమే ఈ శిశువును అనుగ్రహించి వుంటాడు ఆ పరమేశ్వరుడు అన్న ఆలోచన రాగానే మనస్సులో ఆ బాలుని మీద పుత్ర వాత్సల్యం పొంగి వచ్చింది రాజశేఖరునిలో ! జాగ్రత్తగా రెండు చేతులలో ఎత్తుకుని రథంమీద ఒడిలో పరుండబెట్టుకుని కూర్చున్నాడు ! ఏడుపు మాని నవ్వుతున్నట్లు తనవైపే చూస్తున్న బాలుడి ముఖంలోకి తదేకంగా చూస్తూ ఈ చిన్నారి మోము మునుపెప్పుడో చూసినట్లనిపిస్తున్నది ! ఎక్కడ చూసి వుంటాను ?’ అనుకున్నాడు.

చేతుల్లో పసివాడితో అంతఃపురంలో అడుగుపెట్టిన భర్తకు సంభ్రమానందాలతో ఎదురువచ్చింది రాణి ! భర్త చెప్పింది వింటూ పిల్లాడిని తన ఒడిలోకి తీసుకుంది. ‘‘మనం ఇంతకాలంగా ఎదురుచూసిన వరపుత్రుడు ఈనాటికి మన ఒడిని చేరాడు ! భగవంతుడు మనమీద కృపాదృష్టిని కురిపించాడు ! ఈ పసివాడినే మన పుత్రునిగా స్వీకరిద్దాము !’’ అన్నది పసివాడిని ముద్దులాడుతూ ! మెడలో మణిహారాన్ని ఆశ్చర్యంగా చూస్తూ ‘‘ఈ హారాన్ని మీరు అలంకరించారా?’’ అడిగింది. ‘‘లేదు దేవీ ! నేను చూసినప్పుడే ఆ హారం మెడలో వుండినది. భగవద్దత్తంగా భావిచుకుందాము ! ఆస్థాన పురోహితులను రప్పించి నామకరణం , పుట్టిన దిన మహోత్సవాలను జరిపించవలసి వుంది ఎవరక్కడ?’’* అంటూ పరిచారికలను పంపి రాజపురోహితులను పిలిపించాడు రాజశేఖరుడు. 

‘‘మహారాజా ! ఈ పసివాడు కారణ జన్ముడు ! మీ దంపతుల మీద కరుణతో హరిహరుల అనుగ్రహం ఈ పసివాడి రూపంలో మీకు లభించింది ! ఈ పసివానివల్ల మీకు ఆచంద్ర తారార్కమైన కీర్తిప్రతిష్ఠలు చేకూరుతాయి. మన రాజ్యంలో కూడా సుఖశాంతులు నెలకొంటాయి.  ప్రజలు సర్వశుభాలు పొంది ఆనందంగా జీవించగలరు!’’ అంటూ పురోహితులు చెప్పిన విషయాలు మరింత ఆనందాన్ని కలిగించాయి.. రాజదంపతులకు ! ‘‘మా పుత్రుడికి తగిన పేరును , జన్మ తిథి నక్షత్రాలను మీరే గురించి చెప్పండి!’’ అని అడగటంతో పసివాడు లభించిన సమయం మొదలైనవి గుణించారు పురోహితులు. 

  ‘‘మహారాజా ! మీకు లభించిన సమయాన్ని బట్టి అత్యంత శుభసమయంలో బాలుని ఆవిర్భావం జరిగి వుంటుంది , ఉత్తరా నక్షత్ర శుభ ఘడియలలో ! ఈవేళ ఫాల్గుణ శుక్ల పక్ష పంచమి , ఉత్తరా నక్షత్ర యుక్త శుభయోగంని జన్మదిన , జన్మ నక్షత్రాలుగా గణించాలి ! ఇక కంఠంలో మణిహారంతో మీకు లభించాడు గనుక మణికంఠుడనే నామం ఈ బాలునికి అన్ని విధాలా తగినది!’’* అని చెప్పారు! ‘‘మణికంఠుడు ! చాలా బాగుంది పేరు ! ఇకపై మా పుత్రుడు మణికంఠుడని పిలవబడతాడు. ప్రజాలారా ! ఇడుగో మీ యువరాజు ! కన్నుల కరువు తీరా దర్శించుకోండి మీ భావి మహారాజును’’* అంటూ చూడవచ్చిన ప్రజలకు పసివాడిని చూపించి అందరి సమక్షంలో మణికంఠుడని నామకరణం చేశాడు రాజశేఖరుడు పసివాడికి ! ‘‘యువరాజు మణికంఠునికి జయము ! జయము !’’ చూడవచ్చిన పందల రాజ్య ప్రజలందరూ ఉత్సాహంగా జయజయధ్వానాలు చేశారు ! రాజ్యమంతటా పుత్రోత్సవ వేడుకలు జరిపారు ! మణికంఠుడు వచ్చిన వేళా విశేషంవల్ల కొద్దికాలంలో పాడి పంటలతో తులతూగసాగింది పందల రాజ్యం ! ఈతిబాధలు లేవు. అన్నిటికన్నా ఆనందకరమైన విషయం మణికంఠుడు వచ్చిన కొద్దికాలానికే రాణి గర్భవతియై సకాలంలో పుత్రునికి జన్మనిచ్చింది ! రాజదంపతుల చిరకాల వాంచితం ఈడేరింది ! కానీ మణికంఠునిపై వాళ్ల ప్రేమ , వాత్సల్యం తగ్గలేదు సరికదా మరింత ఎక్కువైనాయి! ఇద్దరి పుత్రుల బాల్య చేష్టలు చూస్తూ ఆనందంగా గడపసాగారు!

కాలం వేగంగా గడుస్తున్నది ! మణికంఠుడు దిన దిన ప్రవర్థమానుడౌతున్నాడు ! అక్షరాభ్యాసం , ఉపనయన సంస్కారం జరిపి విద్యాభ్యాసం కోసం గురుకులానికి పంపించాడు రాజు ! ఏక సంథాగ్రాహి అయిన మణికంఠుడు వేదాలు , శాస్త్రాలు కొద్దికాలంలోనే అభ్యసించి అందరికీ ఆశ్చర్యం కలిగించాడు ! వాటితోబాటు క్షత్రియోచితాలైన విలువిద్య , కత్తిసాము , గుఱ్ఱపుస్వారి , మల్లయుద్ధం , శస్త్రాస్త్ర ఉపయోగ ఉపసంహరాలు గురుకులంలోనే వుంటూ నేర్చుకున్నాడు  కొద్దికాలంలోనే విద్యాభ్యాసం పూర్తయింది ‘‘మణికంఠా ! ఎంతో త్వరగా అన్ని విద్యలలో ప్రవీణుడివైన నిన్ను చూస్తుంటే ఆనందం కలుగుతున్నది ! ప్రయోజకుడైన శిష్యుని చూసుకుని గురువు హృదయం తృప్తితో నిండిపోతుంది ! రాజకుమారుడివైనా ఇక్కడ ఇతరులతో అరమరికలు లేకుండా గడిపావు ! సామాన్యుడిలా సేవలు చేశావు ! అందరికీ ఆదర్శప్రాయంగా గడిపావు ! తిరిగి వెళ్లాక నీ ప్రజలను ధర్మంగా పాలిస్తూ సత్యవంతుడివై జీవించు’’ అంటూ బోధించి ఆశర్వదించాడు గురువు విద్యారణ్యుడు.