స్వామి అయ్యప్ప చరితం | Swamy Ayyappa Charitam Part 4

హూ ! ఒకడి పీడ వైతొలగిపోయింది ! ఇక ఆ దానవుడిని కూడా వధించివేస్తాను ’’* అనుకుంటూ పంచాగ్నుల మధ్య నిలిచివున్న రంభుడిమీద తన మాయలన్నీ ప్రయోగించాడు ఇంద్రుడు ! అతను కల్పించిన ఝంఝామారుతాలుగానీ , తుపానులుగానీ , అప్సరసల నాట్యగానాలు కానీ రంభుని మీద ప్రభావం చూపలేకపోవడంతో కోపంతో ఊగిపోతూ వరుణుని తలచుకున్నాడు ఇంద్రుడు !

‘‘దేవరాజా ! నన్ను తలచిన కారణం ?’’ అని అడుగుతూ ఇంద్రుని చెంత ప్రత్యక్షమైనాడు వరుణుడు ‘‘వరుణదేవా ! ఆ రాక్షసుడు నీ మంత్రాన్నే జపిస్తూ ఎంత తీవ్రంగా తపస్సు చేస్తున్నాడో చూసావా ?   నా మాయలేవీ అతని తపస్సును భంగం చేయలేకపోయాయి !’’ అసహనంగా అంటున్న ఇంద్రునివైపు చిరునవ్వుతో చూస్తూ , *‘‘నిజమే దేవేంద్రా ! అతని తపస్సు నాకూ ఆనందం కలిగిస్తున్నది !   అతని కోరిక తీర్చడానికి వివశుడిని చేస్తున్నది !’’ అన్నాడు వరుణుడు ! ‘‘అందుకే హెచ్చరిస్తున్నాను ! నీవు ఆనందంలో అతను కోరినది అనుగ్రహించే ముందు మన దేవతలకే నష్టమూ జరుగకుండా ఆలోచించి వరం ప్రసాదించు’’ అని చెప్పి వెళ్లిపోయాడు ఇంద్రుడు ! ‘‘రంభాసురా !   నీ తపస్సుకు ప్రసన్నుడినైనాను ! ఇలా చూడు !  నీ అభీష్టం ఏమిటో తెలుపు , తీరుస్తాను’’ అన్నాడు వరుణుడు రంభుని ఎదుట నిలిచి ! కళ్లు తెరిచి అగ్నిజ్వాలమధ్యనుండి వెలికివచ్చి నమస్కరించాడు రంభుడు ! ‘‘వరుణదేవా !  నాకు బలపరాక్రమవంతుడు , ముల్లోకాలను పాలించగల ప్రతిభావంతుడైన పుత్రుడిని ప్రసాదించు ! ఇదే నా కోరిక !’’* అన్నాడు రంభుడు !

‘‘అలాగే ! నీవు మొదటగా ఎవరితో సంభోగిస్తావో , వారివల్ల అంతటి బలవంతుడైన పుత్రుని పొందగలవు’’* అని వరం ప్రసాదించి అదృశ్యుడైనాడు వరుణదేవుడు ! ‘‘నా తపస్సు ఫలించింది ! ఇక నా పత్నిని కలుసుకుని , ఆమెను సంతోషపెట్టి , మా వరాల పుత్రుడు జన్మించే శుభ సమయం కోసం ఎదురుచూస్తుంటాను !’’*  అని వూహలలో తేలిపోతూ ముందుకు సాగాడు రంభుడు ! ‘‘ఈ ప్రాంతం ఎంత రమణీయంగా కన్నుల పండుగ చేస్తున్నదో! పచ్చని పచ్చిక బీడులు , పూల మొక్కలతో మనస్సుకు హాయి కలిగిస్తున్నది ! కాసేపిక్కడ విశ్రమించి వెళ్తాను !’’* అరణ్యమార్గంలో సాగిపోతున్న రంభుడు మధ్యలో కనిపించిన పచ్చని పరిసరాలు చూసి ముగ్ధుడై ఆగి చుట్టూ చూశాడు. అతని దృష్టిని కొద్ది దూరంలో పచ్చికమేస్తూ తిరుగుతున్న మహిషాలు ఆకర్షించాయి. వాటిలో తనవైపు చూసిన ఒక మహిషి మీద రంభని మనస్సు లగ్నమైంది ! అప్రయత్నంగా దానివైపు అడుగులు వేశాడు !

   ‘‘హ.. హ.. హ! హ..హ..హ !’’ పెద్దగా నవ్వుకుంటున్న ఇంద్రుని సమీపించి *‘‘ఏమిటి అంతగా నవ్వుకుంటున్నావు ఇంద్రా ? ఎవరి తపస్సు భంగం కావించావు ?’’* అడిగాడు నారద మహర్షి !  ‘‘సమయానికి దయచేశారు మునీంద్రా ! రంభ కరంభులనే దానవులవల్ల నాకు ప్రమాదం ఉందని ఇంతకుపూర్వం వచ్చినపుడు చెప్పారు గదా !  ఆ ఇద్దరినీ అంతం కావించాను ! రంభుడు వరుణునివల్ల వరం పొందినా ఉపాయంతో అతడిని అంతం చేశాను ! తనలోకం చేరి పత్నిని చేరకుండానే మార్గంలో ఒక మహిషిమీద మోహం కలిగించి దానితో సుఖిస్తూ గడిపేలా చేశాను ! మహిష రూపంలో ఆ మహిషితో సుఖిస్తున్న ఆ దానవుడిని మరో మహిష ఎదుర్కొని వాడి కొమ్ములతో చీల్చి చంపివేసింది !  ఇక అతనికి పుత్రుడు కలిగే అవకాశం లేదు గదా నారదా ! అది తలచుకునే నవ్వుతున్నాను’’ అన్నాడు ఇంద్రుడు , తాను చేసిన ఘనకార్యానికి తానే ఆనందిసూ  ‘‘ఆ ! ఆ ! అంతవరకు బాగానే వుంది గానీ తరువాత జరిగింది నేను చెబుతాను విను !

మహిషాసురుడు పట్ట్భాషిక్తుడైన సమయానికి శుక్రుడు వచ్చాడు అతడికి కర్తవ్యోపదేశం చేయడానికి! ‘‘గురుదేవా! సమయానికి వచ్చారు! నన్ను ఆశీర్వదించండి! ఇప్పుడే దానవ సైన్యాలతో కదలి వెళ్లి స్వర్గ మర్త్యలోకాలను ఆక్రమించుకుని వస్తాను! మా తండ్రి పొందిన వరప్రభావంవల్ల వారెవ్వరూ నన్ను జయించలేరు గదా!’’* అన్నాడు మహిషాసురుడు బలదర్పాలు వుట్టిపడుతున్న స్వరంతో ఠీవిగా చూస్తూ!

‘‘నీ ఆశయం మంచిదే కానీ వేగిరపాటు కూడదు! దేవతలు నిన్ను జయించలేకపోయినా, దేవతల పక్షపాతి మహావిష్ణువు ఏదో ఒక మాయతో నిన్ను వధించివేయగలడు. అందుకే తొందర పడవద్దని హెచ్చరిస్తున్నాను. ముందుగా నీవు బ్రహ్మను తపస్సుతో మెప్పించి త్రిమూర్తుల వల్ల మరణం లేకుండా వరం పొంది వచ్చి ఆపైన దేవతలపై యుద్ధబేరి మ్రోగించు , నీ ఆశయం నెరవేరుతుంది!’’* అని శుక్రుడు ఉపదేశించడంతో ఆయన చెప్పినట్లే తపస్సుకు తరలి వెళ్లాడు మహిషాసురుడు! కఠిన తపస్సుతో బ్రహ్మను మెప్పించి స్త్రీ తప్ప త్రిమూర్తులతో సహా దేవతలు , మానవులు , ఇతరులెవరి చేతిలో మరణం లేకుండా వరం పొందాడు. స్త్రీలు అబలలు , వారివల్ల తన వంటి బలపరాక్రమోపేతుడికి ఏ భయమూ వుండదు! అవలీలగా వారిని జయించవచ్చును! అయినా ఏ స్త్రీ తనపై దండెత్తి వచ్చే సాహసం చేయగలదు ? అని తనలో తానే ఆనందపడుతూ తన రాజ్యానికి తిరిగి వచ్చాడు మహిషాసురుడు! మహిషి ప్రేరణతో స్వర్గంపై దాడి చేసి దేవతలను ఓడించి స్వర్గసింహాసనాన్ని ఆక్రమించుకున్నాడు! దేవతలు మహిషాసురుని ధాటికి నిలవలేక భూలోకాన్ని చేరి అరణ్యాలలో గుహలో నివశిస్తూ మంచి కాలం కోసం నిరీక్షిస్తూ గడపసాగారు! భూలోకాన్ని పాలిస్తున్న రాజులనందరినీ జయించి వారిని తన ప్రతినిధులుగా నియమించి తాను స్వర్గ్భోగాలు అనుభవిస్తూ కాలం గడపసాగాడు మహిషాసురుడు.

   ‘‘త్రిమూర్తులకు ప్రణామాలు! హే! సృష్టి, స్థితి లయకారకులారా! వరగర్వంతో మహిషాసురుడు కావిస్తున్న ఆగడాలు అంతకంతకు ఎక్కువౌతున్నాయి! తన రాక్షస పాలనతో సాధు, సజ్జనులను హింసిస్తూ, యజ్ఞ యాగాలను అడ్డుకుంటూ ఆనందిస్తున్నాడు. అతనిని అంతం చేసే ఉపాయం తెలియజేయండి స్వామీ!’’*  అంటూ త్రిమూర్తులను దర్శించి వేడుకున్నారు ఇంద్రాది దేవతలు, ఋషిగణాలు.

   ‘‘దేవతలారా! మహిషాసురుని సంహరించగలది ఒక్క దేవీమాతయే! వరప్రభావంవలన మాలో ఎవరి చేతా మరణం లేని ఆ అసురుడిని అసాధారణ రూపంలో ఆవిర్భవించి జగన్మాత అంతంకావిస్తుంది! అందరూ కలిసి ఆ మాతను ధ్యానించండి!’’ అని బ్రహ్మ చెప్పడంతో అందరూ కన్నులరమోడ్చి భక్తిపూర్వకంగా దేవీమాతను స్తుతించసాగారు.

   అంటూ వాళ్లు స్తుతిస్తుండగా వాళ్లముందర దివ్యకాంతులు వెదజల్లుతూ తేజో మండల మధ్యంలో దేవీమాత సాక్షాత్కరించింది. అందరూ భక్తి ప్రపత్తులతో నమస్కరించి మహిషాసురుని వధించమని వేడుకున్నారు!  దేవి వాళ్లవైపు ప్రసన్నంగా చూసింది.

‘‘దేవతలారా! మహిషాసురుడు ప్రకృతి రూపమైన స్త్రీ శక్తిని సామాన్యంగా భావించి తనను అజేయుడుగా భావించుకుంటున్నాడు! అతని గర్వాహంకారాలను అణచి అంతం కావించడానికి ఆవిర్భవించిన ఈ రూపాన్ని దర్శించండి!’’ అన్నది. 

   దేవతలు, త్రిమూర్తులు ఆశ్చార్యానందాలతో చూస్తుండగా వాళ్లందరి నుండి తేజాలు వెలువడి దేవీమాతలో విలీనం చెందాయి.  అద్భుతంగా ప్రకాశిస్తున్న రూపంతో , వివిధ ఆయుధాలు హస్తాలలో ధరించి సింహ వాహనంపై తరలివెళుతున్న మాతకు ప్రణామాలర్పించారు దేవతలు.

దేవీమాత మహిషుని పురబాహ్యంలో నిలిచి శంఖాన్ని పూరించింది! ఆ నాదాన్ని , ఆమె రూపాన్ని చూసి భయభ్రాంతులైన రాక్షస భటులు ఎవరో దివ్యాంగన సింహవాహనారూఢురాలై పురబాహ్యంలో నిలిచివున్నదన్న వార్తను తమ ప్రభువుకు నివేదించారు. ‘దివ్యాంగన’ అన్న వార్త మోహవిశుడిని చేసింది మహిషాసురుని! ‘‘దివ్యాంగనా? అయితే అసమాన సౌందర్యవతియై వుంటుంది! అటువంటి కాంత నా పట్టమహిషి కావాలి! వెంటనే వెళ్లి ఆమెకు నా అభీష్టం తెలిపి సగౌరవంగా సభకు తీసుసుకురండి! వెళ్లండి వెంటనే!’’ అంటూ మంత్రులను ఆదేశించాడు.

ప్రక్కనే కూర్చుని వున్న మహిషి మాత్రం గంభీరంగా ఆలోచనామగ్నురాలైంది ఆ వార్త విని! ‘‘సోదరా! తొందరపడకు! ఆమె ఎవరో, ఎందుకు వచ్చిందో తెలుసుకోకుండా వివాహ రాయబారం సాగించడం మంచిది కాదు! ముందు ఆ వివరాలు తెలుసుకోవాలి!’’ అన్నది. ‘‘ఆ వివరాలు తెలుసుకోండిగానీ ఆమెను మాత్రం త్వరగా నా సముఖానికి తీసుకుండి! అని చెప్పి పంపాడు మహిషాసురుడు! వెళ్లినవాళ్లు కొద్దిసేపటిలో తిరిగివచ్చారు! వాళ్ల ముఖాలలో భయాందోళనలు స్పష్టంగా కనిపిస్తున్నాయి! వౌనంగా నిలిచారు. ‘‘ఆ దివ్యాంగన రానన్నదా ?  ఏం జరిగింది ?  చెప్పండి త్వరగా!’’ అరిచాడు మహిషుడు అసహనంగా! 

   ‘‘ప్రభూ! అష్టాదశ భుజాలలో వివిధ ఆయుధాలు ధరించి సింహవాహనంపై ఆసీనురాలై వచ్చిన ఆ దివ్యాంగన మిమ్మల్ని యుద్ధానికి ఆహ్వానిస్తున్నది! తనను యుద్ధంలో గెలిచితే మీ అభీష్టం నెరవేరుతుందని తెలియజేయమన్నది! మీ బల పరాక్రమాల గూర్చి ఎంతగానో చెప్పి చూశాము! కానీ ఆమె మా మాటలు లక్ష్యపెట్టలేదు!’’ అన్నారు భయం భయంగా చూస్తూ! ‘‘ఎంత సాహసం? నా మాటను మన్నించకుండా నన్నే యుద్ధానికి ఆహ్వానిస్తున్నదా! ఇప్పుడే వెళ్లి నా శక్తి సామర్థ్యాలు తెలిసేలా చేసి వస్తాను!’’* అంటూ ఆవేశంగా గదనందుకుని లేచాడు మహిషుడు. ‘‘సోదరా! ఇప్పుడు కావలసింది ఆవేశం కాదు ఆలోచన! ఇది ఆ దేవతల పన్నాగంలా నాకు తోస్తున్నది! స్త్రీ చేతిలో మరణాన్ని నీవే కోరుకున్నావుగనక ఈ దివ్యాంగనను ముందర నిలిపి వాళ్లందరూ ప్రచ్ఛన్నంగా నిలిచి నిన్ను బందీని చేయజూస్తున్నట్లున్నారు.