దీనిని బట్టి గడపకి ఎంతటి ప్రాధాన్యత వుందో అర్ధం చేసుకోవచ్చు. గడపని శుభ్రంగా ఉంచడం, పసుపు రాసి, కుంకుమ బొట్లు పెడుతూ వుండటం ప్రాచీన కాలం నుంచి వస్తోంది. అలాంటి గడపపై కూర్చున్నా, నుంచున్నా, గడపపై తలపెట్టి పడుకున్నా పెద్దలు తీవ్రమైన అసహనాన్ని వ్యక్తం చేస్తూంటారు. మరోసారి అలా చేయకూడదని మందలిస్తుంటారు.
గడపకి అంతటి ప్రాముఖ్యతను ఇవ్వడానికి గల కారణమేమిటో ఈ కాలం పిల్లల్లో చాలా మందికి తెలియదు. అందు వల్లనే కొంతమంది గడప మీద కూర్చుని ఇతరులతో కబుర్లు చెబుతూంటారు. కొంతమంది గడపను దాటకుండా దానిపై కాలు పెట్టి వెళుతూంటారు. ఒక్కోసారి దానిపై నుంచుంటారు కూడా. ఇక మరి కొంతమంది గడపపై తల పెట్టుకుని ఏవో పుస్తకాలు చదువుతూ ఉంటారు. అవసరమైతే అలాగే పడుకుంటారు.
ఈ పద్దతి ఎంతమాత్రం మంచిది కాదని శాస్త్రం చెబుతూంది. గడప శ్రీమన్నారాయుణుడి స్థానం. నరసింహస్వామిగా ఆయన అక్కడ కూర్చునే హిరణ్యకశిపుడిని వధించడం జరిగింది. ఇక నారాయుణుడు ఎక్కడ ఉంటాడో అక్కడే లక్ష్మిదేవి కూడా కొలువై వుంటుంది. అందువలన గడప లక్ష్మిదేవి స్థానంగా కూడా చెప్పపడుతోంది. ఈ కారణంగానే గడపను పసుపు కుంకుమలతో అలంకరిస్తూ వుంటారు. అందువల్లనే గడపపై కూర్చోవటం, నుంచోవటం, తలపెట్టి పడుకోవడం వంటివి చేయకుండా దానిని పవిత్రంగా చూసుకోవాలని శాస్త్రం చెబుతోంది.
రచన: పురోహితులు - దేవి మురళీ - Mobile: +91-97175 69840
